नेपाली हास्यव्यङ्ग्य अनलाइन पत्रिका

सीताराम नेपाल :

– “लागेको थियो बोलेको पुर्याउछन् । फाल्तु बोल्दैनन् । भनिए अनुसार सेवामा दत्तचित्त हुन्छन् । तिनको शासनमा पक्षपात हुँदैन । दु:खीको दु:ख हरण गर्दै जनतालाई साँच्चिकै सुशासन दिन्छन् । विकासले छलाङ मार्ने छ ।…. तर तिनले त अरुलेजस्तै सपना मात्रै देखाएका रहेछन् । घोषणापत्रलाई जनता झुक्क्याउने कागज बनाएका छन्।….”

मन्त्रीकै नेतृत्वमा अनेक भ्रष्टाचार गरे । कमिसनका लागि हवाई जहाज डुवाई पानी जहाजको सपना बाँडे । त्यतिले नपुगी गृहमन्त्रीको योजनामा नक्कली शरणार्थी बनाइ, भिजिट भिसाको बहानामा जनतालाई बेच्ने दुस्साहस गरे । आफू र आफ्ना कार्यकर्ता, नातेदारलाई कानुन नलाग्ने गरे। …जहिल्यै कुशासन मात्रै दिए । राम्रा भनिएकाहरूबाटै एकपछि आर्को गलत हर्कत हुन थालेपछि हामी बिदेशिएका थियौँ ।”

एअरपोर्टमा उत्रिएपछि लगेज पर्खिरहेका राजुराज र रामराजाले विदेशिदाको नेपाली राजनीतिको अवस्था सम्झन पुगे ।

“पुरा दशवर्षे जीवन साउदीमा बिताइयो । जतिसुकै भद्रगोल भए पनि आफ्नो देशको याद आउँछ । माया लाग्छ । सकेसम्म नेपालमै बसेर पेसा व्यवसाय गर्दै जनताको सेवा गर्न पाए हुन्थ्यो ।

राजुराज र रामराजा नेविसङ्घ र अखिलका नेता थिए । आफूहरूले दिएका सुझावलाई नेताहरूले बारम्बार लत्याएर झन् झन् जनविरोधी कार्य गरेकाले उनीहरूले मुलुक छाडेका थिए ।

-“नदी नभएको ठाउमा मन्त्रीको सोर्समा पुल बनाएको …

-“मन्त्रीको कम्पनीले सार्बजनिक जग्गा र मसानघाट मिचेर प्लटिङ गरेको ।

-“मन्त्रीको निजी प्लटिङमा सडक बनाउन बजेट छुट्टयाइएको…..

-“आफ्नो ठाडो आदेशमा कानुन बिपरित काम नगर्ने कर्मचारीलाई मन्त्रीले पिटेको ….”

प्रदेशतिरको त्यस्तो खवर पाएपछि ती दुबैले देशभित्रका र बाहिरका सबैका कुरा सुने ।

-“तिमीहरू पनि कुन ड्याङका मुला हौ र !? नेविसङ्घ र अखिले होइनौ र !?”

-“यदि साच्चै देशको माया गर्छौ भने बिपि र पुष्पलालका त्याग र सहिदको बलिदानलाई सम्झ । र उहाहरूको मार्गचित्रमा लाग्न तिमीहरू नै राजनीतिमा उत्र । हामी तिमीहरूका पछुवा बनम्ला । तर तिमीहरूको राजनीति अहिले हामीसँग भनेको जस्तै आदर्शवान हुनुपर्छ । सेवा निस्पक्ष हुनुपर्छ ….”
अन्तत: राजु र राम राजनीतिमा होमिए ।

०००
काठमाडाैं