नेपाली हास्यव्यङ्ग्य अनलाइन पत्रिका

राजेन्द्र घायल :

तँ जुम्रो म हात्ती, तँ कौवा म बाज
छ दर्जा अनेकौं छु बाठो म आज
छ लीला हजारौं छली भेषधारी
तँ के क्रान्तिकारी ? म पो क्रान्तिकारी

म हो खेत गैरी तँ बाँझो बलौटे
म नेता सबैको तँ मेरो भरौटे
तँ माछो म बल्छी घुमन्ते जलारी
तँ के क्रान्तिकारी ? म पो क्रान्तिकारी

तँ निष्ठा पुजारी सधैं वाद जप्ने
सुकाएर आन्द्रा व्यथा दुःख खप्ने
म जेथा बटुल्दै थुपार्दै छु भारी
तँ के क्रान्तिकारी ? म पो क्रान्तिकारी

कुरा गर्छु कस्तो छुरा झै छ धार
म गर्नेछु चर्को कुराको प्रहार
कुराको म ज्ञाता कुरा भेषधारी
तँ के क्रान्तिकारी ? म पो क्रान्तिकारी

तँ धेरै नबोल्ने खटी काम गर्ने
समस्यै समस्या निकै झेल्नुपर्ने
तँ बाटो कुरी बस् छ मेरो सवारी
तँ के क्रान्तिकारी ? म पो क्रान्तिकारी

कमाएँ रमाएँ जम्यो जिन्दगानी
छ पैसा र ठूलो बनेको छु दानी
बनिस् सर्वहारा तँ बानी बिगारी
तँ सिल्ली र आँधो म पो क्रान्तिकारी ।

घायलको घुयँत्रो (२०८१)

०००
चितवन