नेपाली हास्यव्यङ्ग्य अनलाइन पत्रिका

अर्जुन दाहाल (क) :

स्वदेशमा के छ, थाहा छैन, तर परदेशमा भने तीजले पूरै माहोल ढपक्कै छोपिसकेको छ। हप्ता भरि ब्यस्त भएर काम गर्ने अनि शनिबार–आइतबार जति सक्दो रमाइलो गर्दै तीज मनाउने ।

यहाँ त तीज चेलीबेटीहरूलाई मात्र होइन, चेलाबेटाहरूलाई पनि उत्तिकै रमाइलोसँग लाग्ने चाड भएको छ। महिला पार्टी नाचगान, पुरुषहरू पार्टी तास भेला ! तीजको बेला समुद्रको छेउदेखि बेस्मेन्टको कुनासम्म रातो सारीले सजिएको देखिन्छ—व्याकयार्डदेखि नजिकको पार्कसम्म।

अहिले अमेरिकामा साडी र गहना पसलहरू पनि सजिलै पाइन्छन्। अनलाइन पसलहरूले त किनमेललाई झनै सहज बनाइदिएका छन्। नेपाली भाइ तथा छोराहरूले विदेशी नानीहरूसँग प्रेम सम्बन्ध गाँसेका कारण हुनसक्छ, धेरै अमेरिकी महिलाहरूले पनि साडी–चोली लगाउन थालिसकेका छन्। कहिलेकाहीँ त लाग्छ—नेपालीहरूलाई चाहिँ सहयोग चाहिन्छ कि जस्तो!

अहिले अमेरिकामा तीज चाड यति लोकप्रिय बनिसकेको छ कि अमेरिकी सरकारले सार्वजनिक बिदा दिने विषयमा छलफल भइरहेको भन्ने हल्ला समेत छ। ‘बिदा दिनुपर्छ’ भनेर ह्वाइट हाउसमा निवेदनसमेत दर्ता भएको सुनिन्छ। अब समस्या त अमेरिकी सरकारलाई नै परेछ—डेढ-दुई महिना मनाइने चाडको बिदा कुन दिन दिने भन्ने !

अलिक कठिनाइ त स्कट ब्राण्डको रक्सीको अभावमा देखिएको हो भन्ने सुनिएको छ। धेरै नेपालीले तीजको अवसरमा त्यसै ब्राण्डको रक्सी खपत गरिदिएकाले, लिकर स्टोरहरूमा स्टक टुट्ने सम्भावना बढेको छ रे। तर, वैकल्पिक व्यवस्था गर्न नहुने कुरा त कहाँ हो र ?

हामी हाम्रो मौलिक संस्कृतिलाई जोगाउँदै, आवश्यक परेमा अन्य संस्कृतिका राम्रो पक्षहरू समेट्दै अगाडि बढिरहेका छौं। जे भए पनि, हाम्रो माटो र संस्कृति टेकेरै अगाडि बढेका छौं— भुइँ त छोडिएको छैन क्यारे।

जय होस् !

०००
व्यङ्ग्य लेखक नुन चिनी पानी अमेरिकाका परिकल्पनाकार हुन्  ।