नेपाली हास्यव्यङ्ग्य अनलाइन पत्रिका

दीनानाथ पोख्रेल : 

खाना स्वस्थ लिने दिए सीप ठुलो विज्ञानका पारखी।
सच्चा जीवन धान्न योग्य पथका हुन् कर्मका सारथि ।।
दुख्छन् मानव नित्य ज्ञान हितको त्यागे र बिर्से भने ।
पाका ईश्वर रम्दछन् अवनिमा मान्छे विवेकी बने ।।५१।।

यी सन्तान रमून् गमेर मनले आफू खटेका कुरा ।
आफ्नै सन्तति अग्लिऊन् मन लिई शिक्षा दिएथे पुरा ।।
मान्छे बन्न सकिन्न बुझ्नुछ स्वयम् सम्मान बिर्स्यो भने ।
पाका ईश्वर रम्दछन् अवनिमा मान्छे विवेकी बने ।।५२।।

सक्छन् उठ्न स्वयम् जमेर भवमा आधार मैले दिए ।
आफ्नै चल्दछ वासना मगमगी हाँसेर वाणी दिए ।।
बाटो योग्य खनी हिँडाउन सकूँ यो ज्ञान पक्रेँ भने ।
पाका ईश्वर रम्दछन् अवनिमा मान्छे विवेकी बने ।।५३।।

चल्छन् वर्ष र बार नित्य महिना जाे भुल्छ बेला गति ।
त्याे हाे मूर्ख बडाे कुमानव भनी भन्छन् बुझेका जति ।।
जे छन् शाश्वत बुझ्न ख्याल नगरे लाटाे समानै बनेँ ।
पाका ईश्वर रम्दछन् अवनिमा मान्छे विवेकी बने ।।५४।।

मायाप्रेम अनन्त चल्छ उनमा एक्लो नहोस् जीवन ।
छन् संवेग समान बुझ्न म सकूँ सम्पूर्ण जानोस् मन ।।
एकाङ्गी मन हुन्न वृद्ध जनको जाने छ राम्रो हुने ।
पाका ईश्वर रम्दछन् अवनिमा मान्छे विवेकी बने ।।५५।।

०००
सुम्बेक, इलाम नगरपालिका वडा नं ०२, इलाम