नेपाली हास्यव्यङ्ग्य अनलाइन पत्रिका

लक्ष्मी रिजाल :

“काका ! म पढेर पनि किन बेरोजगार ?” युवकले मोबाइल झोलामा हाल्दै सोध्यो ।

दिउँसो चोकको पुरानो पीपलमुनि धुलो उडिरहेको थियो । सडकमा पोस्टर टाँस्नेहरूको भीड थियो, नाराका आवाजहरू हावामा तैरिरहेका थिए ।

काकाले युवकलाई ध्यानले हेरे । “पढाइ कम भयो कि अवसर ?”

“पढाइ त धेरै गरियो,” युवकले गुनासो पोख्यो, “तर जागिर भने पहुँचले पाउँदो रहेछ । मेहनत त मानौँ धुलोझैँ उड्छ ।”

पीपलका पातहरू हल्का हल्लिए, मानौँ समयले आफैँ केही भन्न खोजिरहेको हो ।

काका मुस्कुराए, “त्यसो भए तिमी के बन्ने सोच्दैछौ ?”
युवकले टाढा झुण्डिएका ब्यानरहरू हे¥यो, जहाँ ठूला अक्षरमा ‘परिवर्तन’ लेखिएको थियो ।

“सायद नेता,” उसले धीमे स्वरमा भन्यो, “त्यसपछि त अवसर आफैँ आउँदो रहेछ ।”
काका केही बेर मौन रहे ।

पछि गहिरो स्वरमा भने, “देशलाई नेता होइन, न्यायलाई रोज्ने नागरिक चाहिएको छ ।”

०००
२०८२/११/३०
कञ्चनरुप नगरपालिका, सप्तरी