कुमार खड्काचार ठाेक्तक
समयको दायित्वबोध हुन सके आस हुन्छ समय परिस्थितिजन्य तादम्यता खास हुन्छ शत्रुझै अपमानले गाल्दै थङ्थिलो पारेपछि, नीलडामको मालिस गर्दा पनि डर, त्रास हुन्छ ।
इ. कुमार खड्का :
१.
हेर्दै त्रिपुरजस्ता लाग्ने महल उदीयमान छन्
हाम्रै श्रम पसिनाको आर्जन असमान छन्
भ्युटावर, गेट, सालिक असान्दर्भिक संरचनाहरू,
साधनस्रोत टाट पल्टाउने उनका फर्मान छन् ।
२.
बेमौसमी राग अलाप अराजक र जघन्य हुन्छ
प्रभु-कृपा जागेपछि भररातमै धन्य हुन्छ
आधिकारिक सौजन्य वा कतैको प्रायोजन हो ?
कुन ग्रह दाहिना भए पुरानो करार अनन्य हुन्छ ?
३.
चमत्कार नै भए पनि मान्छे भगवान् हुँदैन
उम्दो काममा लगानी गर्दै कोही धनवान् हुँदैन
संयोग र तजबिजलाई प्रारब्ध भन्लान् कसैले,
समयभन्दा ज्यादा कोही पनि बलवान् हुँदैन ।
४.
समयको दायित्वबोध हुन सके आस हुन्छ
समय परिस्थितिजन्य तादम्यता खास हुन्छ
शत्रुझै अपमानले गाल्दै थङ्थिलो पारेपछि,
नीलडामको मालिस गर्दा पनि डर, त्रास हुन्छ ।
०००
हालै प्रकाशित मुक्तकसङ्ग्रह ‘शीर्षकविहीन शीर्षकहरू’ बाट
धेरै धेरै धन्यवाद गुरु ! धन्यवाद फित्कौली !! आभारी भएँ 🙏