नेपाली हास्यव्यङ्ग्य अनलाइन पत्रिका

लक्ष्मण नेवटिया :

जबदेखि मेरो अफिसले
“वर्क फ्रम होम” भन्ने निर्णय सुनायो,
मेरी श्रीमती “मेरिना”ले घरका सबै काम
खोजी–खोजी मेरै जिम्मा लगायो।

​मेरी मेरिनाले बुझिनन्
“वर्क फ्रम होम”को अर्थ,
मेरो जीवन भयो व्यर्थ।

हरे! मरीमरी काम गर्दा
थाकेर भएँ चुर,
कति छिन् मेरी मेरिना क्रूर!!

​झाडु, पोछा, भाँडा माझ्ने,
कपडा धुने, साग पनि काट्ने।
कहिले छोराछोरीलाई समात्ने।
कहिले कुकुरलाई बगैंचामा
लगेर घुमाउने-
पायक पर्दै मुताउने।

बोसले भन्थे “वासलात बनाऊ”,
हरे! यहाँ श्रीमती भन्छिन्
खाली किन बस्ने
“कुचो लगाऊ”।

दिनभरि माउस समाउने हात,
अहिले मेरी मेरिनाको आदेशमा
चलेका छन् दिनरात।

​मेरो त उड्यो सिटीपिटी
भान्सामा नालायक “कुकर”ले
जब लगायो
दुईको साटो दस सिटी।

०००
विराटनगर