नेपाली हास्यव्यङ्ग्य अनलाइन पत्रिका

कुमार खड्का :

देखेर हुँदैन भित्रै महसुस गर्न सक्नुपर्छ
रेलिएर हुन्न आइपर्दा भेल तर्न सक्नुपर्छ
हारजितकै कुरा हुन्छ स्वार्थको दुनियाँमा,
चढ्नेबढ्ने मात्र हैन तल झर्न सक्नुपर्छ ।
१

स्वाभिमानी मान्छे प्रकृतिमा निर्भर हुन्छ
समयचक्र पूरा गर्न उपयोगमा प्रखर हुन्छ
आपसी सम्बन्धको नापोलाई बुझ्दाबुझ्दै,
अस्तित्वको लडाइँ बुझ पचाउँदै कहर हुन्छ ।
२

समय सन्दर्भको कुरा बुझ्ने पनि क्रम हुन्छ
बढी जान्ने, बाठो हुँदा सद्दे किर्ते भ्रम हुन्छ
नचाहिँदो चासो लिए अर्थ हुँदैन रँगेटिनुको,
जे जे भने पनि आखिर मिठो परिश्रम हुन्छ ।
३

टेको सम्झे भर हुन्छ, प्रेम हुँदा आस हुन्छ
मनमा विचलन भए आफैँसँग त्रास हुन्छ
धेरै साबितीमा लाग्ने माखेजालमा परेजस्तै,
उम्रँदै तीन पातको पाइलैमुनि भास हुन्छ ।
४

०००
आलापोट, काठमाडौं