नेपाली हास्यव्यङ्ग्य अनलाइन पत्रिका

इ. कुमार खड्का :

१.
अग्रगामी मानिसको मन, मुटुमा आशा हुन्छ
अवसरवादी चरित्रको दुईजिब्रे भाषा हुन्छ
छाती चिसो पार्नुभन्दा आत्मबोधको ध्येय राम्रो,
वस्तुगत मूल्याङ्कनले सम्हालिनु खासा हुन्छ ।

२.
हिजो डङ्का पिट्थ्यो, आजकल कतै भुक्दै होला
धुत्र्याइँको नमुना थियो, याचनामा झुक्दै होला
किर्ते सतरन्जमा झुटको माहोल बनाउँदै हो, वा
गोहीको आँसु झारेर विरहको धुन फुक्दै होला ?

३.
पूर्णचन्द्रको आभासँगै लोभिन्छ यो मन दङ्ग भै
क्षीर सागरको डुबुल्कीमा पग्लँदो प्रेम तरङ्ग भै
शब्दचित्रका लालित्यभित्र बहकिँदो मौनताले,
नसाका प्यालामा मदहोसीले झुम्छन् भाव भङ्ग भै ।

४.
आगो सौर्य रूप हो, सृष्टिको नायक कहलाउँछ
सन्तुलित उपयोगमा यसैले सभ्यता चलाउँछ
मर्दापर्दा व्यहोर्ने झिल्को बहुआयामिक प्रयोगमा,
गल्तीका रौद्ररूपले सम्पूर्ण जगत जलाउँछ ।

५.
शैक्षिक क्षेत्र लथालिङ्ग राजनीतिको प्रेत छिर्छ
उच्छृङ्खलता अघि बढ्दा साँच्चै जेहन्दारलाई पिर्छ
व्यवस्थापन अस्तव्यस्त अनावश्यक हस्तक्षेपले,
दुरवस्था गुणस्तरको अब क्षति कसले तिर्छ ?

०००
आलापोट, काठमाडौं
शीर्षकविहीन शीर्षकहरु (२०८२)