नेपाली हास्यव्यङ्ग्य अनलाइन पत्रिका

कुमार खड्का :

ज्ञानीले दुई थोप्ला जोड्दै सरल रेखा बनाउँछ
समस्याको समाधानमा स्वयम् अब्बल जनाउँछ
तीन थोप्लाको ज्यामितीय त्रिभुज र त्रिकोणले,
विवेकपूर्ण समीकरणको तथ्य, तर्क अपनाउँछ ।
१.

अवसरवादी हाटमा फौबन्जारी छुट्टै नाउँ हुँदैन
चेपारेको बेसारे माया सत् चारित्रिक भाउ हुँदैन
के फरक पर्छ पप्पीलाई वस्त्र अथवा निर्वस्त्रले ?
किर्तेको सतरन्जमा इमानको कुनै ठाउँ हुँदैन ।
२.

कानुन भन्ने कुन चरो ? अगुवा नै मिच्ने गर्छन्‌
रक्षकहरू नदेखेझैँ पैतालाले थिच्ने गर्छन्‌
मनमौजी व्याख्या हुन्छन्, अविवेकी हगुवाहरूको,
दिनरात भिन्दाभिन्दै कित्ता ल्याप्चे किच्ने गर्छन् ।
३.

बढे राजनको कुशासन फेर्न नयाँ क्रान्ति गरियो
यिनै मतियारहरूको बिचमा झन् चेपुवा परियो
प्रजातन्त्र, लोकतन्त्र, गणतन्त्रको जलप लगाउँदै,
अमृत भन्दै लहैलहैमा काफी मन्दविष छरियो ।
४.

सबैभन्दा बोझिलो भारी अरूसँगको आशा हुन्छ
इच्छा, आकाङ्क्षा ढेर लाग्दा पीडा र निराशा हुन्छ
स्वाभिमान बचाउनुपर्दछ, शिर उचो राख्न सधैँ,
घाँटीअनुसार हड्डी निल्नु स्वावलम्बी भाषा हुन्छ ।
५.

०००
आलापोट, काठमाडौं
शीर्षकविहीन शीर्षकहरु (२०८२)