नेपाली हास्यव्यङ्ग्य अनलाइन पत्रिका

रमेश समर्थन :

१.
विगतका स्मृति यदि साँच्न खोज्दै छ,
रोदीघरमा मन फेरि नाच्न खोज्दै छ,
ढल्दो उमेरमा मायाप्रीति बस्यो भने बुझ्नुस्‌
जिन्दगी स्वप्निल जीवन बाँच्न खोज्दै छ ।

२.
कुर्ता सलवार अनि लहङ्गा र साडी आयात गर्छौँ
सियो, रिन्ची, साइकल अनि गाडी आयात गर्छौँ
हामी निर्यात गर्छौँहाम्रा जाँगरिला तन्नेरीहरूलाई
सट्टामा चोर, भिखारी र कबाडी आयात गर्छौँ ।

३..
असत्यको पर्दाले सत्यको राज छोपिन्न
मागेको लगौँटीले फुस्केको लाज छोपिन्न
यी जनता हुन् यिनलाई सबै कुरा थाहा छ
हातले मुख छोपेर विरोधको आवाज छोपिन्न ।

४.
लड्दै, उठ्दै, हिँड्दै सधै अघि बढ्नुपर्छ
हारलाई हराउँदै शिखरतिर चढ्नुपर्छ
बाहिरका शत्रुसित लड्न बरु सजिलो छ
ठुलो लडाइँ त मान्छेले आफैँसित लड्नुपर्छ ।

०००
रुपन्देही