नेपाली हास्यव्यङ्ग्य अनलाइन पत्रिका

आचार्य नन्दलाल :

१.
कुर्सी फेरियो, उस्तै पुरानै खेल छ,
भाषणभरि मह, व्यवहारमा फेल छ ।
जनताले फेरि ताली बजाइरहेकै छन्,
चुनावपछि वाचाको खुल्ला सेल छ ।

२.
मोबाइलमै डुबेर मन महान् भयो,
आफ्नै आँगनभन्दा पर्दा जहान भयो ।
आँसु पुछ्न कोही आएन वरिपरि,
इमोजी नै आज साँचो सम्मान भयो ।

३.
घुसलाई पनि कसैले अब दान भन्यो,
कमिसनलाई राष्ट्रकै सान भन्यो ।
ऐना लाजले चर्केर टुक्राटुक्रा हुँदा,
चोरले आफूलाई इमानदार मान भन्यो ।

४.
कामभन्दा फोटो खिच्ने दौर चल्यो,
सत्यलाई नै ओझेल पार्ने शोर चल्यो ।
पुल बनेन, उद्घाटन सयौँपटक भयो,
विकासभन्दा प्रचारकै जोर चल्यो ।

५.
सत्य बोल्नु आज सबैभन्दा जोखिम छ,
झुट बेच्नु बजारभरि ठूलो मौसम छ ।
इमानदार अझै पालो कुरेर उभिएको,
ठगको घरमा हरेक साँझ उत्सव छ ।

०००
२०८३ असार २३ गते ।
बेलका, सिद्धार्थटोल, उदयपुर ।