नेपाली हास्यव्यङ्ग्य अनलाइन पत्रिका

लक्ष्मी रिजाल :

​१.
तपाईंले पाँच सय पचाउन नसक्दा त्यो खोर पाउनुभयो, बाजे !
तिर्खा लाग्दा पनि पानी नपाई हण्डर खाइनुभयो, बाजे !
आज भए करोडौँ पचाएर पनि भिआईपी सुइट मिल्थ्यो,
तपाईं त साह्रै सोझो भएर पो हत्कडी लाउनुभयो, बाजे !

​२.
अड्डा अदालतमा ‘भोलि भोलि’ भन्ने भोलानाथ अझै छन्, बाजे !
तपाईंको श्लोकले नसुध्रिएका हाकिमहरू बुरुक्क उफ्रिन्छन्, बाजे !
अहिले त तारेख धाउँदा-धाउँदा कपाल मात्र होइन,
तारेख दिने हाकिमका सात पुस्ता पनि बित्छन्, बाजे !

​३.
तपाईंले दुःख गरेर फलाएको भाषा बोल्न लाज मान्छन्, यहाँ !
‘मम्मी-ड्याडी’ नभने त बच्चालाई नै पाखे ठान्छन्, यहाँ !
‘एकदिन नारद सत्यलोक पुगिगया’ भनी कण्ठ गर्ने नातिहरू,
आज ‘नो नेपाली प्लिज’ भन्दै सिधै अमेरिका हान्छन्, यहाँ !

​४.
घाँसीले त कुवा खनाएर कीर्ति राख्ने विचार गरेछ, बाजे !
तपाईंको मनमा पनि कविताको मीठो रहर भरेछ, बाजे !
आजका नातिहरू कुवा होइन, सरकारी बजेटको इनार खन्छन्,
कीर्ति त थाहा भएन, आफ्नो बैंक ब्यालेन्स चाहिँ ह्वात्तै बढेछ, बाजे !

​५.
तपाईंले जेलमा बसेर रामायणका श्लोकहरू कोर्नुभयो, बाजे !
आरोप लाग्दा पनि कविताकै माला उन्नुभयो, बाजे !
अहिलेका कवि भए जेलबाटै टिकटक लाइभ बस्थे,
तपाईंले त श्लोक लेखेरै हाकिमको सातो लग्नुभयो, बाजे !

०००
२०८३/०३/२८
कञ्चनरूप-१२, रूपनगर, सप्तरी