नेपाली हास्यव्यङ्ग्य अनलाइन पत्रिका

हरिशंकर परसाईं :

व्यङ्ग्यानुवाद : रमेश समर्थन

खबर सनसनीपूर्ण छ । मध्यप्रदेशका एउटा भोपालनिवासी मन्त्रीका लागि प्रतिदिन कम्युनिष्ट पार्टीको कार्यालयको इनारबाट पानी लगिन्छ ।

दिनदिनै एउटा ठेलामा आइतबारेस्थित कम्युनिस्ट इनारबाट पानी ल्याउने गरिन्छ ।
भिन्न भिन्न प्रकारका प्रश्नहरू उठ्छन् ।

सहरमा धेरै इनारहरू छन् । फेरि पनि यसै इनारको पानी किन छनोटमा पर्‍यो ?

त्यो पानी राम्रो छ भने त्यसको प्रमाण ?

कांग्रेस अनुशासनका अनुसार कांग्रेसी मन्त्रीले कम्युनिस्टले खुवाएको पानी खानु के ठिक हो त ?

कम्युनिस्टहरू कांग्रेसी मन्त्रीलाई आफ्नो इनारको पानी किन खान दिन्छन् ?

कम्युनिस्टहरू भन्ने गर्छन् कि उनीहरू त अचेल बडे बडे कांग्रसीहरूलाई ‘पानी खुवाउँदै छन्‌’ । उनीहरूको सोच छ

कि यस पानीमा साम्यवादका किटाणु छन् जसले सोझै मन र मस्तिष्कमा प्रभाव पार्दछन् ।

हाम्रो मान्यता के छ भने मन्त्रीको स्वास्थ्यका लागि यो पानी हानिकारक सावित हुनेछ र यसबाट उनीहरूको सरकारी स्वास्थ्य बिग्रिन सक्छ । काटजू साहेबलाई आफ्ना सहयोगीहरूको स्वास्थ्य ठिक राख्नु छ अनि एउटा इनार मन्त्रीको आवासको परिसरभित्र खनाउनुपर्ने छ । मन्त्रीहरू यसरी अर्काको इनारतिर जानु राम्रो होइन ।

रुसबाट कुनै नयाँ चूर्ण आएको छ र त्यो भारतका सबै कम्युनिस्टहरूमा वितरण भएको छ अनि यसलाई पानीमा मिसाएर खुवाएपछि खाने मान्छेको सोच एकदम फेरिन्छ भन्ने सुनिन्छ ।

श्रीमन्नारायणजीलाई यस रहस्यबारे तत्कालै थाहा हुनुपर्ने हो नि अवैध रूपले आउने यस चूर्णमा रोक लगाउनुपर्ने हो ।

०००
(यो लघु व्यङ्ग्य परसाई रचनावली ४ मा सङ्कलित ‘कांग्रेसी मिनिस्टर और कम्युनिस्ट कुवाँ !’बाट अनुवाद गरिएको हो ।)