नेपाली हास्यव्यङ्ग्य अनलाइन पत्रिका

के छैन यहाँ ?
साइकल नहुने नेताको करोडको कार यहीँ छ
नारायणहिटी भन्दा ठूलो तीनको दरबार यहीँ छ
जसले नैतिकताको कुरा उठाउँछ
उसैको अर्काकी श्रीमती उडाको घरबार यहिँ छ ।

करोडको हैन खरबको भ्रष्टाचर यहीँ छ
त्यो भ्रष्टाचार गर्ने मुर्दार यहीँ छ
तपाईं हामीलाई थाहा भएर पनि के हुन्छ ?
त्यो भ्रष्टाचारीलाई जोगाउने सरदार यहीँ छ ।

के छैन यहाँ ?
गरिबी देखाएर चन्दा माग्ने हतियार यहीँ छ
त्यही चन्दामा हलिमुहाली गर्ने मतियार यहीँ छ
तपाईं हामीले बिरोध गरेर भो र ?
अरबौँ खाए पनि मुक्ति दिने अख्तियार यहीँ छ ।

के छैन यहाँ ?
राष्ट्र ढुकुटी उडाउने चौकिदार यहीँ छ
जति खाए पनि नअघाउने खरदार यहीँ छ
बिकासको कामलाई बर्षौ लगाउने ठेकदार यहीँ छ
तपाईं हामी चिच्चाएर भयो र !
त्यो ठेकदारलाई ठेक्का दिलाउने सरकार यहीँ छ ।

आफ्नो आङको भैंसी नदेख्ने
अरुको आङको जुम्रो देख्ने सँधियार यहीँ छ
अघिपछि प्रतिपक्ष हुने तर खाने बेला
एकै पक्ष हुने अङ्शियार यहीँ छ
अनुगमन पनि यहीँ छ,
कालो बजार पनि यही छ
जती राष्ट्रवादको कुरा गरे पनि
सत्ताको लागि पराईको
पाउ पर्ने लम्पसार यहीँ छ ।

दाङ, हाल काठमाडौं