नेपाली हास्यव्यङ्ग्य अनलाइन पत्रिका

भो, शान्त रहनूस्
चुनावपछि
बन्न थाल्नेछन्- सपनाका त्रिकोण
र, उड्न थाल्नेछन्- भुइँका सडक
तिनै त्रिकोण पहिरिएर गलामा
चुम्नेछु- मंगलग्रहको आकाश
जहाँ फुलेका हुनेछन्- उन्यूका फूल ।

हो, प्रतीक्षा गर्नूस्
चुनावपछि
बल्न थाल्नेछन्- आँखामा दियो
र, गुड्न थाल्नेछन्- घरका बैठक
तिनै दियोमा थपेर बर्तन
रच्नेछु- आफ्नै धर्ती र आकाश
जहाँ फल्नेछन्- पलाँसका बुटामा अनारका दाना ।

हो, कल्पन्थेँ
चुनावअघि
इन्द्रेणी रहरहरू थिए जीवनमा
रहरमै फुलेको थियो- ढकमक्क सयपत्री
फूलका पत्रमा लुकेझैँ लाग्थ्यो जवानी
जोडघटाउका तिनै पत्र केलाउँदै बिताएँ दैनिकी
र, आफैंले गरेँ- आफ्नै जितको भविष्यवाणी ।

चुनावअघि
फेरिए तन्ना, सोफा र झ्यालका पर्दा
फेरियो शील र घरको रौनक
चुलिए आकांक्षाका उन्नत हिमाल
सिलाएँ दौरासुरुवाल र मिल्दो कोट
आफैँले तयार पारेँ सपथ र प्रेस नोट ।

अहिले क्लान्त छु
मलाई विजयी घोषणा गर्नुअघि
के गर्दै छन्- ती मानिसहरू
किन धक्धक् धड्किरहेछ मुटु
किन तिरमिराउँदै छ- गुलावी चस्मा
र, हल्लिदै छ- मतपेटिका
त्यही मतपेटिकाभित्र
कसरी सल्बलाउँदै छन् मतपत्र ?

काठमाडौं