नेपाली हास्यव्यङ्ग्य अनलाइन पत्रिका

देखेथ्यौँ स्वप्न हामीले “गणतन्त्र उदाउँदा
काँचुली देशले फेर्ला, निर्धाको दिन आउला”
बगायौँ त्यसका निम्ति आफ्नो रगतको भल
रहेछन् ‘राम’ ठानेका हरामी नम्बरी खल

देशले आज भोग्दै छ महा अस्तित्व-सङ्कट
पारी धरापमा देश, दङ्ग छन् नकटा शठ
मेची कोसी महाकाली कर्णाली अनि गण्डकी
उराल्छन् आँसुका छाल, स्वाभिमान छ बन्धकी

महाभूल भयो हाम्रो ठानेर ‘देशरक्षक’
‘लेन्डुपे’-पथगामी यी नाङ्गिए ‘देशभक्षक’
टुक्का सिद्ध भएको छ ‘माछो माछो र भ्यागुतो’
आज लाज लजाएर पसेको छ स्वयं दुलो

न लग्यो भुइँचालोले कोरोनाले न ता लग्यो
यिनलाई बचाएर हाम्रो नियतिले ठग्यो
कवितामात्र यो हैन, न त आक्रोशमात्र हो
आजको देशको हाम्रो हो कारुणिक चित्र यो

देशद्रोही जनद्रोही रीति-संस्कार-ध्वंसक
अत्याचारी अहङ्कारी भ्रष्टाचारी निरङ्कुश
पाखण्डी बहुरूपीको शीघ्रातिशीघ्र अन्त्य होस्
“जय नेपाल” उद्घोष आकल्प गुञ्जिँदै रहोस्
०००
नकटा=निर्लज्ज ।

काठमाडौं