नेपाली हास्यव्यङ्ग्य अनलाइन पत्रिका

मेरो यो मतले जितेर किन खै सञ्जाल सारा भरी ।
घुम्दै छौ घरमा बिचार नगरी आफन्त नाता छरी ।।
देख्दा लाज भयो लुकौं म कसरी छोपेर आँखा बसे ।
लागे आज बिमानको सफरमा कालो गुफामा पसे ।।
१

कस्ता शासक देख्छु यो मुलुकमा लोभी र पापी हरे ।
मेरो यो मत मूल्यहीन किन भो आश्चर्य आफैं परे ।।
आशा भाव कसे बसे जतनले तातो खरानी घसे ।
लागे आज बिमानको सयरमा कालो गुफामा पसे ।।
२

देख्दा पाण्डव भाइ झैँ छ शकुनी मोदी चुडायौ किन ।
प्रेमालाप गरेर बोल्छ अब को सामन्त आफै चिन ।।
आशादार मुना झरे बगरमा चित्कार नौला कसे ।
लागे आज बिमानको सयरमा कालो गुफामा पसे ।।
३

घृणा लाग्दछ पिप्पिका प्रियरणी दुर्गन्ध नौलो छरी ।
चारैतर्फ निराश यो मुलुकमा बस्दैछु एक्लै डरी ।।
ज्वाली छैन र अन्धकारमय यो यी स्वप्न सारा खसे ।
लागे आज बिमानको सयरमा कालो गुफामा पसे ।।
४

माछा बन्छ र तादुरी भन सखे के फूल काडा बने ।
आफ्ना चिन्दछु लौ चिने हृदयले सौ कोश टाढा बने ।।
चिल्ला भाषण रोप्छु बाग मनमा नारा अनेकौं घसे ।
लागे आज बिमानको सयरमा कालो गुफामा पसे ।।
५

प्राप्त्याशा मनमा भयो र जनता प्राकार आफै बनी ।
दाताको मतदानले दिनदिनै नेता बनेका धनी ।।
कैयौं दीन, गरीब देख्छु जनता भोका र नाङ्गा बसे ।
लागे आज बिमानको सयरमा कालो गुफामा पसे ।।
६

यस्ता मानवको बयान कसरी गर्छौ तिमी नै भन ।
निष्ठा बेच्छ सधैं मिले पद सबै लौ तोद आफै गन ।।
अर्काको धन खान वा मन चुँडी नारा अनेकौं घसे ।
लागे आज बिमानको सयरमा कालो गुफामा पसे ।।
७

पाटन २ सिलंगा, बैतडी
हालः-पहलमानपुर, कैलाली