नेपाली हास्यव्यङ्ग्य अनलाइन पत्रिका

जहाँ योग्यताको कुनै मोल छैन
जहाँ मोल चिन्ने कुनै योग्य छैन
कुरामात्रले हुन्न यो रोग शेष
यहाँ मृत्युशय्या पुगेको छ देश !!

न कोही छ गर्ने यहाँ काम एक
कुराबाट टार्छन् समस्या अनेक
सबै विज्ञ बन्ने अनौठो छ रोग
यहाँ देशमात्रै सधैँ गर्छ शोक !!

कतै विज्ञ आए स्वयं भोट पाई
समस्या निफन्ने उकेरा लगाई
कहाँ पाउँथे काम ती गर्नलाई
प्रजातन्त्र हाँस्यो कि रोयो डराई !!

कुरा बुझ्नुपर्नेहरू बुझ्न छाडे
नबुझ्नेहरू बन्न पाएर साँडे
उचाले कसैले कसैले पछारे
सधैँ देशलाई निचोरेर मारे !!

तगारा नियाल्दै उठौँ एक बन्दै
छिचोलेर सारा समस्या निफन्दै
कुरा बुझ्न सक्दा समस्याहरूका
समस्याहरूमै समाधान हुन्छन् !!

मेनपा १३, झापा, हाल बेलायत