नेपाली हास्यव्यङ्ग्य अनलाइन पत्रिका

भाषा भर्दछ यौटाले अर्कोले भाव भर्दछ
शैली भर्दछ अर्कैले अर्कैले प्राण भर्दछ
कोरेकै भरमा खाका गनिन्छु ‘श्रेष्ठ लेखक’
द्रव्यको भित्रिया खेला के पो बुझ्छन् र पाठक !
०
आफ्नै खर्च गरी ग्रन्थ शानले म छपाउँछु
प्रकाशक कुनै ठूलो संस्थालाई बनाउँछु
विमोचन गराएर खादा-माला-अबीरले—
पुरिई मञ्चमा बस्छु गम्किँदै अभिमानले
०
पालेको छु दिई चारो प्यारो भजनमण्डली
गर्छन् कीर्तन, थाक्तैनन् गाएर विरुदावली
पड्काउँछु पुरस्कार ठूलो आफ्नै म दामले
नपछ्याई धरै छैन मलाई मान-नामले
०
खर्च जत्ति हुने मेरै, आयोजक हुने अरू
चाहे त्यो होस् पुरस्कार या तक्मा पदवीहरू
प्रतिष्ठान छिटै खोल्छु म आफ्नो नाममा अब
र, पुरस्कारका भोका लाग्नेछन् लाममा सब
०
बन्न लेखक के गाह्रो ? प्रतिभा किन चाहियोस् ?
नसक्ने द्रव्यले के छ ? मात्र द्रव्य थुपारियोस्
म त यौटा हुँ दृष्टान्त,मजस्ता कति छन् कति
छ बाटो सजिलो किन्तु गोपनीय छ यो अति ।

बारा, हाल काठमाडौं