नेपाली हास्यव्यङ्ग्य अनलाइन पत्रिका

कागपूजा र सेलभोज एकै दिन नपरे पनि एउटै पर्वमा पर्ने कार्यक्रम हुन् । त्यसैले कौवा सेलको सांस्कृतिक सम्बन्ध त्यत्तिकै घनिष्ठ छ जति लोकसाहित्य र हास्य-व्यंग्यको । तताउने तेलको अभाव होस् वा तात्ने तेलको महँगी, हाम्रा ताईमा सेल घुमर्किनुपर्छ, सुखको प्रभाव होस् वा शान्तिको महँगो, हाम्रा स्वभावमा हाँसखेल झल्किनुपर्छ । उहिल्यै बाजेका पाला देखिको नेपालीको यस आनिवानीमा टिष्टाको पानीले कुनै अन्तर ल्याउन सक्तैन । त्यसैले जहाँ रहेका भए पनि हँसमुख नेपालीका हँसमुखी लेखनीहरू सँगेटेर औतार-औतारका माला गाँस्ने टण्टा कौवा प्रकाशनले स्वयं बेसाएको हो ।

यसै क्रममा केही एकलौटी र केही मिलिजुली मालाहरू प्रकाशनले देखाउँदै ल्याएको छ । सामूहिक हास्य-व्यंग्य पद्यमा हामीले ’छयाकन बटुल्यौँ; तर त्यसमा मेचीपारिका हँसमुख कविताहरू त्यति उन्न सकिएन । त्यसैले एउटा धोको बाँकी ने थियो, खोजिमेलीको दुःख अरू कसैले बेसाइदिए ठेलिमेलीको श्रेय आफूले सुइँक्याउनुहुन्थ्यो ! नभन्दै हाम्रो निम्ति दाहालजीले देउसी- खेलिदिनुभो र एउटा सिङ्गै ‘सेलको माला’ कमाई ल्याइदिनुभयो उहाँको यो गुन हामीले बिर्से पनि हाम्रा पाठकहरूले बिर्सने छैनन् ।

‘सेलको माला’ कति फुलेको छ, कति मिलेको छ, अथवा कति गुलियो र स्वादिलो छ- त्यसको पारख गर्नेले गर्दै गर्लान्; हामीलाई त यत्ति मात्र भन्नु छ- नेपाली हास्य-व्यंग्यमा कविताको रस यस्तै छ । चाहे भित्रको होस् चाहे बाहिरको आखिर अभिव्यक्ति उस्तै छ ।

– कौवा प्रकाशन
सं. नरबहादुर दाहालको ’सेलको माला’ पहिलो संस्करण २०३१ बाट