नेपाली हास्यव्यङ्ग्य अनलाइन पत्रिका

गोही, गोमन सर्प या अरिमठे घस्रन्छ जेजे तँ खा !
लेदोसाथ अचेल झर्छ असिना बर्सन्छ तेजाब खा !
हेर्दै थर्थर काम्छ जो अघि परी तर्सन्छ खोसेर खा !
तेरो पाउ समात्छ, रुन्छ दिल नै पस्रन्छ सोसेर खा !

फाले एक गते लुतो अब लु तो जा त्यो अगुल्टै तँ खा !
राख्छन् पिण्ड पुरेतले तट पुगी खोजी बुकुल्टै तँ खा !
केको पाक्छ बजेट उन्नति भई काँचो कचल्टै ल खा !
माग्नेका घरमा पसेर उसका दाह्री जगल्टा तँ खा !

मेरो खा तनखा नखा अब तँ भन् लौ खान्न आफैं तँ खा !
खाँदो खा, गलगिद्ध खा, गगनमा उड्दै छ रे गिद्ध खा !
मागेको अनुदान, मान, रिनको विज्ञान जेजे छ खा !
रक्सी पार्न प्रयोग चप्पल अरू पाइन्छ केके तँ खा !

यो त्यो खा यति खा म भन्दिनँ लुटी हाब्रो बढाएर खा !
होलान् जे जति मूल्यवान् वनबुटी सीमा कटाएर खा !
आ ! हैजासँग रोगका सिलिबिली ढाडी र लाभ्रा ल खा !
केको पार्नु धरा हरा झिंगनु खा ! सल्ला र काभ्रा तँ खा !

कालो कट्टुस खा ! खुरुक्क निउरी बोक्रा र काँढा ल खा !
बत्ती बल्न न दे ! उसै समयमा टर्बाइनी तार खा !
चङ्गाझैं किन उड्नु दुर्बल यहाँ ? धागो र माडा ल खा !
पङ्गू, थेत्तर, लम्पटे, गँजडिया, घ्याम्पे र ट्यापे तँ खा !

गर्छन् देशविकास यन्त्रबलले आसे तँ एसै ल खा !
रित्तो रीत छ के छ मौलिक बता भेटिन्न भेटे तँ खा !
आफ्नै मासु लुछेर खा विरहको दिक्दारको दुःख खा !
देख्ने छैन निकाय या नियमले छेक्दैन सम्पूणर् खा !

भोजपुर, हाल काठमाडौं