नेपाली हास्यव्यङ्ग्य अनलाइन पत्रिका

पैल्हे प्रेम थियो बसीकन मिठा हुन्थे कुरा दिन्दिन
बारी खेत बजार हाटहरुमा हुन्थ्यौं संगै छिन्छिन
भ्रष्टाचार गर्यौ पुग्यौ शहरमा अन्तै भयौ तल्लीन
तिम्रो होस गुम्यो कि आज अथवा चिन्दिन भन्छौ किन ?

चोरी चट्ट विचारका रसहरु विद्वानको स्वाँगमा
पैरी बेसन रूप त्यो शहरीया फोस्रो फिका ढ्वाँगमा
नेताका दलमा गयौ अघि पछि चोखो बनी सँङ्लिन
तिम्रो होस गुम्यो कि आज अथवा चिन्दिन भन्छौ किन ?

बिर्को ढक्कन बुद्धिको नगदले लायौ कि बाली कतै
भान्साभित्र छिरी अमुक दलको खायौ कि छाली कतै
घस्रेको अझ सम्झना छ अघिका हेर्यौ पुराना दिन
तिम्रो होस गुम्यो कि आज अथवा चिन्दिन भन्छौ किन ?

स्वाट्टसुट्ट छिर्यौ अघिपछि गरि फोटो खिच्यौ सङ्गमा
मौकामा घनघोर साखिलो बनी रङ्गीन् भयौ रङ्गमा
पस्छौ खान लुसुक्क चाकर गरि जान्छौ रे केही लिन
तिम्रो होस गुम्यो कि आज अथवा चिन्दिन भन्छौ किन ?

ठेक्कादार अपार माल छ मिठो चुस्की विदेशी रस
नाना झेल गिजोल बाह्र बखडा गर्छौ अरे तामस
यस्ता विघ्न उठाउँदै जगतमा थाल्यौ तिमी उक्लिन
तिम्रो होस गुम्यो कि आज अथवा चिन्दिन भन्छौ किन ?

गौरादह, झापा