दुष्यन्त भट्टराईबस्ने भए
स्वाँठै स्वाँठहरू इँजार चुँडियोस् नाँचेर बस्ने भए अर्कामा कु-कुरी गरी कपुत यी हाँसेर बस्ने भए जो हो मान कमान शान घरको ठोकेर बस्ने भए पारी देश अचार हर्ष मनमा बोकेर बस्ने भए ।
सत्ताको रस तप्प झर्दछ भने चाटेर बस्ने भए
सत्ता बाहिर बस्नु पर्दछ भने फाटेर बस्ने भए
सक्दैनन् हतियारले वचनले काटेर बस्ने भए
पालोमा पद बार-बार गफिँदै साटेर बस्ने भए ।।१।।
सत्तामा मतभिन्नता म त कता छानेर बस्ने भए
आफू बस्न नपाउँदा झगडिया हानेर बस्ने भए
आफू मात्र छु सत्यको प्रतिक झैँ ठानेर बस्ने भए
बाँकी हुन् सब झूटका तृण भनी मानेर बस्ने भए ।।२।।
आफ्नो चाह हुँदैन पूणर् यदि ता छेकेर बस्ने भए
अर्काको भर माथि चढ्दछु भनी टेकेर बस्ने भए
गर्ने काम तमाम गर्न नदिई रोकेर बस्ने भए
मात्रै भाषणमा समुन्नत भनी खोकेर बस्ने भए ।।३।।
पोलापोल गरेर गोप्य सबका खोलेर बस्ने भए
नौलो झोल बनाउँदै वचनका घोलेर बस्ने भए
सारा द्वार गरेर बन्द घरको ठेलेर बस्ने भए
स्वार्थी सङ्गतले सधैँ मुलुक यो पेलेर बस्ने भए ।।४।।
स्वाँठै स्वाँठहरू इँजार चुँडियोस् नाँचेर बस्ने भए
अर्कामा कु-कुरी गरी कपुत यी हाँसेर बस्ने भए
जो हो मान कमान शान घरको ठोकेर बस्ने भए
पारी देश अचार हर्ष मनमा बोकेर बस्ने भए ।।५।।
०००
मेनपा १३, झापा, हाल बेलायत
Subscribe
Login
0 Comments
Oldest
