नेपाली हास्यव्यङ्ग्य अनलाइन पत्रिका

मण्डी ओढेर चण्डी
भटभट्याउने ऊ नै,
ब्राण्डी चढाई मज्जाले
ठण्डी भगाउने पनि ऊ नै ।
कुरा ढाँट्ने पनि ऊ नै,
कुरा छाँट्ने पनि ऊ नै।
कुरा बिगार्ने पनि ऊ नै,
कुरा मिलाउने पनि ऊ नै।
झपार्ने पनि ऊ नै,
मुसार्ने पनि ऊ नै,
जिन्दाबादमा पनि ऊ नै,
मूर्दाबादमा पनि ऊ नै,
पहिले तम्सिने पनि ऊ नै,
पछि हच्किने पनि ऊ नै,
फुटेकोलाई जोडने पनि ऊ नै,
जुटेकोलाई फुटाल्ने पनि ऊ नै,
आगो सल्काउने पनि ऊ नै,
आगो – आगो, भागौँ – भागौँ
चिच्याउने पनि ऊ नै,
कुरोको चुरो थाहा भएर पनि
कुरामैँ अल्झाएर
नयाँ – नयाँ कुरा थप्दै जान
पोख्त छ ऊ “कुराबहादुर“
अदभूत नै छ उसको
दोधारे चरित्र !
पहिले मच्चिने पनि ऊ नै,
पछि सच्चिने पनि ऊ नै,
यति हुँदाहुँदै पनि
जब पर्छ टोलमा झोल,
सबैलाई चाहिन्छ किन ??

०००
विराटनगर