नेपाली हास्यव्यङ्ग्य अनलाइन पत्रिका

दुध खाँदा ग्याष्ट्रिक हुन्छ रक्सी खान्छु कान्छा !
लोकल कुख्रा नभैकन मिठो हुन्न भान्सा
गाउँघरको बुज्रुक हुँ म नेतागिरी गर्छु
अवसरको खेती गर्न सँधै अघि सर्छु ।

बेलामौकाँ पार्टी फेर्छु फाइदा काँ छ हेर्छु
भ्रष्टचारी कर्मचारी अँगालोमा बेर्छु
चोकबजारमा फूर्ती लाउँछु देशी चुरोट खान्छु
संसारको ज्ञानको ठेली आफैंलाई ठान्छु ।

अमेरिका अष्ट्रेलिया मेरो गफको खेती
यो देशको ढुङ्गामाटो मनखपर्दैन तेती
त्यसैले त छोराछोरी उतै पठाको छु
बूढीलाई नि उतै लान टिकट कटाको छु ।

निर्वाचनमा जितें मैले मत पनि किनें
पैसा किन चाहिंदो रै छ भन्ने कुरा चिनें
त्यसैले त पुलबाटो आँखा लाउँन थालें
धूपौरेलाई अघि सारी सबै टेण्डर हालें ।

करोडौंको गाडी चढ्छु विकास खर्च काटी
आश्वासनको गीत गाउँछु जनतालाई ढाँटी
जनताको प्रतिनिधि भन्छन् सबै मलाई
गुट झुटमा रमाउँछु आस्थालाई जलाई ।

कसैलाई पोखरा र ईलाम घुमाइदिन्छु
सौरहा र भेडेटारमा लगी झुमाइ दिन्छु
त्यति गर्दा मेरो पनि काम राम्रो बन्छ
चन्दा सन्दा चटाइ दिन्छु कस्ले बेठिक भन्छ ?

कर्मचारी भ्रष्टचारी पोको पारीपारी
नजराना ल्याइदिन्छन् जस्ले भारीभारी
तीनैलाई अवसरमा तक्मा लगाई दिन्छु
सोझा सिधा इमान्दारको सातो भगाई दिन्छु ।

बाटोघाटो जताततै धूलो उडिरा’ छ
मलाई भने एसी गाडीभित्र मस्ती भा’ छ
आफू समान रैतीलाई कैल्यै पार्नु हुन्न
यहि मन्त्र लिइ हिंड्छु ठाँगेले नि छुन्न ।

०००
गौरादह, झापा