नेपाली हास्यव्यङ्ग्य अनलाइन पत्रिका

सारा नीति विधान कानुन बने, बाठा बने मानिस ।
निर्धाका अधिकार माग सिपको, व्यर्थै भयो कोसिस ।।
नारा भाषणले र मात्र गफले, बन्दैन हाम्रो घर ।
हाम्रा कानुन संविधान विधिले, फालेन भस्मासुर ।।
१
अग्ला श्वेत हिमालले जमिनमा, आभा दिए भर्खर।
गैह्रा सागर शान्त छन् अवनिमा, छर्छन् प्रभा भास्कर ।।
मान्छेका इतिहासका नियमका, ठेली बने सुन्दर ।
हाम्रा कानुन संविधान विधिले, फालेन भस्मासुर ।।
२
हाम्रा पूर्वजका उनै सहिदका, उम्दा थियोे गर्जन ।
हामी सन्ततिका सबै गरिबका, बढ्दै गयो रोदन ।।
जाग्यो सङ्कटकाल यो मुलुकमा, जागेन को भन्छ र ।
हाम्रा कानुन संविधान विधिले, फालेन भस्मासुर ।।
३
धेरै चोटि भए उदात्त पनका, सङ्घर्ष आन्दोलन ।
हाम्रा सोच विचार शासन कला, गिर्दै गयो जीवन ।।
सारा नैतिक शास्त्र चिन्मय छटा,मान्ने यहाँ को छ र ।
हाम्रा कानुन संविधान विधिले, फालेन भस्मासुर ।।
४
डाँका चोर दलालका कहरले, भत्क्यो सबै सम्मति ।
सत्ता शासनमा सधैँ छ झगडा, होला र के उन्नति ।।
जाली भ्रष्टहरू हटाउन सके, मिल्ला खुसी आखिर ।
हाम्रा कानुन संविधान विधिले, फालेन भस्मासुर ।।
५

०००
बट्टार, नुवाकोट
बालाजु, काठमाडौं
मोबाइल नं. ९८४१७५८१८४