नेपाली हास्यव्यङ्ग्य अनलाइन पत्रिका

‘धुलाबारी’बाट बसमा चढेको
छेउको यात्रीलाई
मैले जब सोधें परिचय ?
धाराप्रवाह बोल्न थाल्यो,

बुबा जन्मेको ‘होक्लाबारी’,
आमा जन्मेकी ‘गेडाबारी’,
छोरा जन्मेको ‘जामबारी’,
छोरी जन्मेकी ‘सिमलबारी’,
श्रीमती जन्मेकी ‘भैंसाबारी’
ससुरा जन्मेको ‘तुलसीबारी’

म जन्मेको ‘केराबारी’
हुर्केको ‘जामुनबारी’
स्कूल पढेको ‘हल्दिबारी’
ससुराली ‘आयाबारी’
वाणिज्य व्यवसाय ‘डाँगीबारी’

बिहान ‘करेसाबारी’
बेलुकी ‘फूलबारी’
कसैले तिर्न नमान्दा खाएको उधारी
घरखर्च टार्न लाउदै छु अब
‘लौका‘, ‘मुला’, तरकारीबारी

यतिकैमा कन्डक्टर चिच्यायो
धेरै सुनियो तपाइँको ‘झापा’- बारी
ओर्लनुस् आयो ‘मोरंग’को ‘बेलबारी’
नत्र फेरि पुर्‍याइदिउँला सोझै
‘सुनसरी’को ‘भण्टाबारी’ ।

०००
विराटनगर