नेपाली हास्यव्यङ्ग्य अनलाइन पत्रिका

बिउ मासेर गौरव गर्छन् किसानहरू
स्वार्थपूर्तिमा पुरुषार्थ देख्छन् नेताहरू
हात थापेर जिउ पाल्छन् कर्मचारीहरू
छलकपटमा रमाउँछन् व्यापारीहरू
कर्तव्य बिर्सेर उत्तरदायी बन्छन् अभिभावकहरू
यातना दिएर योग्य कहलिन्छन् शिक्षकहरू

ज्यालादारीमा चुनाव प्रचार गर्छन् कार्यकर्ताहरू
भरिएको खल्ती खोज्छन् स्वास्थ्यकर्मीहरू
धमिलोमा माछा मार्छन् वकिलहरू
भ्रमको खेती लाउँछन् पत्रकारहरू
घडेरी बेच्छन् सुकुम्बासीहरू
बोलपत्र खोल्छन् निर्माण व्यावसायीहरू
विलास बाँचेर आदर्श बाँड्छन् शासकहरू

सिकार गरेर अहिंसाको गीता गाउँछन् पुजारीहरू
आफन्तलाई जागिर दिन्छन् समाजसेवीहरू
पुरस्कार साट्छन् साहित्यकारहरू
अरुको धन खेलाउँछन् बैंकरहरू
शब्दखेल खेल्छन् सङ्गीतकारहरू
चाकरी माग्छन् सेवाप्रदाय दाताहरू
नैतिक शिक्षा पढाउँछन् भ्रष्टाचारीहरू

चुनाव जितेर साँवा व्याज असुल्ने उमेदवारहरू
अन्त्यमा यी र यस्तै मिल्छन् मित्रहरू र
निर्बाध बनाउँछन् देश चलाउने कानुनहरू !!

०००
पर्वत, हाल काठमाडौं