नेपाली हास्यव्यङ्ग्य अनलाइन पत्रिका

प्रजातन्त्र र गणतन्त्र जन्माउँदा
प्रसव पीडाले थलिएको मेरो देश
पुनः अस्मिता लुटिएको पीडाले
छट्पटाइरहेछ, तड्पिरहेछ ।
अनि
एकाधिकारवादी रक्तपिपासु
कपुतहरूले पटकपटक
गरेको चिरहरणको ब्यथाले
मेरो देश भक्कानिइरहेछ ।
साथै
त्यो भरिएको सिउँदोमाथि
बिधुवाको जवानी बोकेर
अझै मेरो देश रोइरहेछ ।
सायदै
प्रसव पीडाले चहर्‍याएको घाउमा
मलम पट्टी लगाउँदा
आफ्नै कपुतहरूका
दृष्टि दोषी भएर हो ?
वा
पटकपटक पारिबाट
लुटिएको अस्मिता
जोगाउदा जोगाउँदै
भाँचिएको अस्थिपन्जर
जोड्न नसकेर हो ??
अपितु
न्यायिक हकहितका
भाषण छाट्ने ती देशद्रोहीहरूले
जिउँदै जलाइरहँदा
मुखमा पट्टी बाँधेर
अझै मेरो देश दुःखीरहेछ ।

०००
रातोपुल, काठमाडौं