नेपाली हास्यव्यङ्ग्य अनलाइन पत्रिका

उस्तै छन् हिम शैल पर्वतहरू उस्तै चराका ध्वनि
उस्तै फाँट उपत्यका र मनका छन् देशवासी गुणी
उस्तै छन् जल सम्पदा वन उही उस्तै सबै आखिर
के ले उठ्न दिँदैन खै मुलुकको झुक्दै गएको शिर ।।१।।

नेपाली बलवीर छन् भुवनका भन्छन् बुझेकाहरू
मार्छन् मर्नु अगाडि शत्रुजनको गर्छन् सफाया बरु
जान्दैनन् छलछाम वा कपट वा ठग्ने कला माहिर
के ले उठ्न दिँदैन खै मुलुकको झुक्दै गएको शिर ।।२।।

गोर्खाली इतिहास पढ्छ जसले गाथा सधैँ वीरको
कैल्यै बस्नु परेन आश्रित हुँदै साम्राज्य संसारको
यस्तो देश थियो भनेर जहिले अग्लो बनेको शिर
के ले उठ्न दिँदैन माथ घरको झुक्दै गयो आखिर ।।३।।

चित्तानन्द हुँदै यहीँ ऋषिहरू गर्थे तपस्या पनि
देवी देवहरू यही जमिनमा घुम्थे हमेशा रमी
हाम्रै स्वर्ग धरा पुराण सबको उल्लेखमा सुस्थिर
के ले उठ्न दिँदैन खै मुलुकको झुक्दै गएको शिर ।।४।।

जन्मे बुद्ध पवित्र पावन धरा हो लुम्बिनी काखको
यो मात्रै छ वसुन्धरा सगरमा चुम्ने उचो माथको
हाम्रा अग्रजले बचाउन धरा काटे झुकेनन् शिर
के ले उठ्न दिँदैन माथ घरको झुक्दै गयो आखिर ।।५।।

हामी नै गतिला सुसङ्गठित हौँ भन्थ्यौँ हिजो सम्म ता
हामी नै बल बुद्धि पूर्ण सबमा भन्छौँ अझै झन् युवा
हामीमा कमजोर के छ र कता के ले भयौँ अस्थिर
के ले उठ्न दिँदैन खै मुलुकको झुक्दै गएको शिर ।।६।।

०००
मेचीनगर, झापा
हाल अमेरिका