नेपाली हास्यव्यङ्ग्य अनलाइन पत्रिका

कतै रात पर्दा, कतै घाम मिल्छ ।
कतै हर्ष मिल्दा, कतै कष्ट हुन्छ ।।
निशा काल डाक्ने, छ यो रात रानी ।
छ यो धान्न गाह्रो, यहाँ जिन्दगानी ।।-१

यहाँ आज मान्छे, बने तारकाझैँ ।
बढ्यो भ्रष्ट पारा, हरामी दशाझैँ ।।
खुसी खोस्न सक्ने, परेको छ बानी ।
छ यो धान्न गाह्रो, यहाँ जिन्दगानी ।।-२

खुबै लुट्न खोज्ने इरादा छ कस्तो ।
रुढी काल रम्दै, दशा डाक्छ जस्तो ।।
नशा दोष थप्दै, बिगा-यो जवानी ।
भयो धान्न गाह्रो, यहाँ जिन्दगानी ।।-३

हियो तालु दुख्दा, खुबै त्रास बढ्छ ।
छ सन्तान टाढा, भने आस मर्छ ।।
कतै हुन्छ गल्ती, भने हुन्छ ग्लानि ।
भयो धान्न गाह्रो, यहाँ जिन्दगानी ।।-४

यहाँ छैन आफ्नो, छ मायालु घेरो ।
तृषा पाल्छ मान्छे, न तेरो न मेरो ।।
कठै देह गुम्दा, भयो लौ खरानी ।
छ यो बुझ्न गाह्रो, यहाँ जिन्दगानी ।।-५

०००
२०७९/१०/१९
बट्टार, नुवाकोट हाल काठमाडौं
मोबाइल नं. ९८४१७५८१८४