नेपाली हास्यव्यङ्ग्य अनलाइन पत्रिका

विदेशतिर चाहिँ त्यस्ता त्यस्ता हर्ताकर्ता
हाम्रो देशमा चाहिँ यस्ता यस्ता हर्ताकर्ता
हामीलाई अन्याय गर्‍या हौ कि मजाक गर्‍या हौ ?
कि तिमी पनि यी नेताको भाषणले भ्रममा पर्‍या हौ ?
युरोप अमेरिकातिर त्यस्ता त्यस्ता कर्ता
हाम्रो देशमा चाहिँ किन यस्ता जर्ता ?

हे भगवान ! के गरिसेकोे यस्तो हजुरले ?
सिङ्गापुरे आमाको कोखाँ ली क्वान दिने
मलेसियन आमाको कोखाँ महाथिर दिने
अनि हाम्री आमा कोखाँ चाहिँ यस्ता विर विर दिने ?
कोही बिहान दक्षिणका कुरा गर्ने साँझ उत्तर छिर्दिने
कोही एउटासँग इङ्गेजमेन्ट गर्ने भोलिपल्टै अर्कोसँग हिँड्दिने ।

अरु देशलाई नेता दिने
हाम्रो देशलाई सर्प भ्याकुता दिने
यो कस्तो भेदभाब !
हैन हाम्रा आमाहरूले के गरेकाथे त्यस्तो महापाप ?

उताको आमाको कोखाँ हाती, चितुवा, बाघ दिने
हाम्रो आमाको कोखाँ चाहिँ हुट्टीट्याउँ र काग दिने ?
हामीलाई छिमेकीले, पर परकाले त हेपे हेपे
हजुर सृष्टिकर्ता भइकन पनि हेप्ने ?
यस्तो घोर अन्याय कहिलेसम्म खेप्ने ?
भारतलाई मोदी दिने, चाइनालाई सि दिने
अनि हामीलाई चाहिँ हेपेर यी दिने ?
हेपाइ पनि त हद हुन्छ गाँठे !
हैन, तिनका बाले के खा थे त्यस्ता पुत्र दिने
अनि यिनका बाले के खाएनन् र यस्ता कुपुत्र दिने ?
यो त हदै भो प्रभु !
मिल्छ भने भएकालाई सच्चाई देऊ
मिल्दैन भने फिर्ता लगेर त्यतै कुच्च्याई देऊ ।

०००
घट्टेकुलो, काठमाडौं