विमल निभाजुत्ता
अब दृश्य परिवर्तन हुन्छ कृपया ध्यान दिनोस् कविताका मेरा प्रिय पाठकहरू ! हाम्रो शिरमाथि चढेर एक जोर कालो जुत्ता घोषणा गर्दै छ सगर्व- देशवासीहरू हो हामीले कसम पूरा गरेका छौं यो देशलाई पूरै बदलेका छौं ।
देशलाई बदल्छु भनेर
कसम खानेहरूले
एकाएक बदलेका छन् आफ्ना जुत्ता
जुत्ताको रङ छ कालो
विश्वासघातको रङ पनि
कालो नै हुन्छ
र काला रातहरूमा
उत्सव मनाउँछन्
दलाल, पाखण्डी, भाट,
बेइमान र जुवाडेहरू
दुष्ट जादुगरले
उचाल्यो चमत्कारी लट्ठी
घुमायो वायुमण्डलमा
र हामीले हेर्दाहेर्दै गायब भयो
यो देशको शरीरबाट
सबभन्दा नरम छाला
त्यसपछि सफल षड्यन्त्रकारी
र त्यसका अनुचरहरूले लगाए
त्यही छालाबाट निर्मित
जुत्ता
हिजोआज जताततै
काला जुत्ताहरूले कुल्चिरहेका छन्
पहाड, उपत्यका र तराईको करङ
यही करङलाई भर्याङ बनाएर
पुगेका छन् जुत्ताधारीहरू
सबभन्दा माथिल्लो तलामा
एउटा विशाल कक्षमा
सजाएर राखिएको छ स्वर्णासन
जसको दुवैतिर तैनाथ छन्
हिंस्रक वनमानुषहरू
बन्दुक र बर्दीमा
अब दृश्य परिवर्तन हुन्छ
कृपया ध्यान दिनोस्
कविताका मेरा प्रिय पाठकहरू !
हाम्रो शिरमाथि चढेर
एक जोर कालो जुत्ता
घोषणा गर्दै छ सगर्व-
देशवासीहरू हो
हामीले कसम पूरा गरेका छौं
यो देशलाई पूरै बदलेका छौं ।
०००
‘एउटा बाहुला नभएको बुसर्ट’ (२०६७)
Subscribe
Login
0 Comments
Oldest
