रमेश खकुरेलङार्रङुर्र
स्थिति यदि यसखाले हुन्छ ता होस गर्नू हस र हुस कसैका पक्ष लागी नगर्नू बरु सुरुसुरु आफ्नै नीडमा भित्र घुस्नू झटपटसित ढोका बन्द आग्लो घुसार्नू ।
कुकुर अनि बिराला गर्दछन् ङार्रङुर्र
वरपर जन हुन्छन् भीतिले थर्रथर्र
चलफिर पनि गर्ने काम गर्नै दिँदैनन्
दुर दुर जति बोलौँ मान केही लिँदैनन् ॥१
यदि यसतिर लागूँ झम्टिने छन् उताका
उसतिर उभिएमा छन् चिथर्ने यताका
यदि पर पर हट्तै बीचमा गै बसेमा
जिउभर दुइटैको मारले हुन्छ धामा ॥२
स्थिति यदि यसखाले हुन्छ ता होस गर्नू
हस र हुस कसैका पक्ष लागी नगर्नू
बरु सुरुसुरु आफ्नै नीडमा भित्र घुस्नू
झटपटसित ढोका बन्द आग्लो घुसार्नू ॥३
हरदम झगडाको हेतु हो त्यक्त हाड
जुन कुकुर बिराला निम्तिमा हो पहाड
तर बुध जनलाई लालसा हुन्न केही
यसतिर मुख मोडी बस्छ केही नहेरी ॥४
०००
काठमाडौं
