नेपाली हास्यव्यङ्ग्य अनलाइन पत्रिका

यता थिए उता सरे, उता हुँदा यता सरे
पछारिए, उठे मने जसो सके उसै गरे
छ दाउ खान मात्रको जता सरेर मिल्छ जे
बुझेर झट्ट दौडिए भँडार जे जता छ रे ।

उता हुने यता सरे कुनै चढे कुनै झरे
झरे सबै अभाग्यवान् अनित्य दाउका परे
झिनासिना उसै बढे नगण्य भाउका चढे
लडे भने हिजो हुने प्रसिद्ध टाउका लडे ।

कुनै छ किन्न तत्पर,कुनै छ बिक्न आतुर
बजारझैं छ दासको अपूर्व दृश्य दुर्दुर
छ भाउवाल दाउमा कमाउँला,जमाउँला
जमाउनै अभीष्ट हो जरो दह्रो समाउला ।

विशेष देशमा सधैं विशेष पात्र आउँछन्
विशेष पात्रका प्रपौत्रसम्म मान पाउँछन्
यता छँदैछ दासको सुदास दासमण्डल
छ तम्तयार चाकडी तयार यार चम्मच ।

भने भनोस् न लोकले निकृष्ट,दुष्ट वञ्चक
विदेशको गुुुलाम वा परम्परा विनाशक
सहीरहे हुनेछ नै विशिष्ट लाभदायक
कहाँ उसै त जुर्छ रे विशिष्टता, विधायक ?

अनेक दुुःख झेलियो नुुुहेर हात जोडियो
जमीन सम्पदाहरू लिलाम मूल्य बेचियो
कतै तिरेर लागियो कतै छिरेर भागियो
टुपी बिक्यो, उपायहीन भै स्वयं बिकाइयो ।

पसेर विक्रिकक्षमा शरीर यो सजाइयो
दलालले खसीसमान गाथ सुम्सुम्याइयो
कुनै दलाल लाल छन् कुनै कराल काल छन्
स्वरूप, वृत्ति जे रहोस् मनग्य मालवाल छन् ।

पुरानु सत्र पल्टियो थपेर एक बल्झियो
लडेर सत्र पल्टिने पुग्यो शिरान मा- कुरो
जहाँ सधैं महेश छन् विशिष्ट नृत्यपुङ्गव
वहाँ अनेक भक्त छन् सिपालु नाच्न ताण्डव ।

०००
इलाम