नेपाली हास्यव्यङ्ग्य अनलाइन पत्रिका

जङ्गलमाथि अनेक लगाइयो आरोप,
बाटो बनेन-
किनकि जङ्गलले- बाटो दिएन ।
उद्योग लागेन-
किनकि जङ्गल-फाडिन मानेन ।
खनिज उत्खनन भएन-
किनकि जङ्गलले पस्न दिएन ।
बस्ती बसेन-
किनकि जङ्गलले हात्ती रोक्न जानेन ।
जहाज ओर्लेन-
किनकी जङ्गलले हवाई मैदान दिएन ।
विद्युत पुगेन-
किनकी जङ्गलले पोल ठड्याउन मानेन ।
आरोपित जङ्गललाई समात्न पूर्जि बोकेर
नक्सा अनुसारको अजङ्गका रूख भएको क्षेत्रमा
जब निकाय पुग्यो-
त्यहाँ “जङ्गलको ठूलो नामपट्ट” त देखियो,
तर सुस्केरामा बाँचिरहेको धरातलमा
कतै पनि एक बोट भेटिएन ।
आफ्नो अपाङ्ग सोचले मात्र,
जङ्गललाई दोष दिएर के हुन्छ ??

०००
विराटनगर