नेपाली हास्यव्यङ्ग्य अनलाइन पत्रिका

भयङ्कर षड्यन्त्रको सिकार भएर पनि
असह्य यातनाको कठोर पीडा सहेर पनि
सारा इन्द्रजालको प्रत्यक्षदर्शी भएर पनि
जो आवाजविहीन मूर्ति भएर
चुपचाप बाँच्न विवश छन्
सारा कुरा थाहा पाएर पनि
जो अनभिज्ञझैं बनेर
एकान्तमा रुन विवश छन्
जो आफन्तबाटै पीडित भएर पनि
आफन्तलाई नै विश्वास गर्न अभिशप्त छन्
जो हजारौं हिंसा सहेर पनि
रुन्चे हाँसो हाँस्न विवश छन्
तिनको कथा लेखिदिने
कोही लेखक छ ?

जो षड्यन्त्रका शृङ्खला सहँदा सहँदै
सामाजिक, मानसिक र सामाजिक स्वास्थ्य
सबै सधैंका लागि गुमाएर
निभेको आगो बनेर बाँचिरहे
जो हमेशा भगवान पुकार्दै
आफ्नो लुटिएको भाग्य जाँचिरहे
तिनको व्यथा लेखिदिने
कोही पत्रकार छ ?

हो, धैर्यको बाँध फुटेपछि
षड्यन्त्रको पर्दाफाँस गरिनु पर्छ
यातनाको चिरफार गरिनु पर्छ ।

०००
२०७९/१२/२०
काठमाडौं