नेपाली हास्यव्यङ्ग्य अनलाइन पत्रिका

ठोक्तक १

अपरिचितको बात सुनी एकोहोरो खुल्नु हुन्न
अज्ञात स्थलमा भौतारिदै एक्लै एक्लै डुल्नु हुन्न
वाधा अड्चन आए पनि हरेश नखाइ जिन्दगीमा
को हुँं म र के गर्नु छ भन्ने कहिल्यै भुल्नु हुन्न ।

ठोक्तक २

माया लाए पनि सधैं साथ कहाँ मिल्छ हजुर
जहाँ गइ लुके पनि भुसुनाले चिल्छ हजुर
उतार चढाव आउँदै गर्छन् यस्तै रैछ जिन्दगानी
धेरै चोट नदिनु है मेरो पनि दिल छ हजुर ।

ठोक्तक ३

काम सबै छुटिगयो राहत पाउन गाह्रो भयो
टाढा बस्दा सम्झना छ घर आउन गाह्रो भयो
बजेट ढिलो बैठक ढिलो कामै ढिलो सरकारको
यस्तै चालले जनताको मनमा छाउन गाह्रो भयो ।

ठोक्तक ४

बाहिरफेर हिडौं भने कोरोनाको भय
घरभित्र बस्दा भयो जीवन पीडामय
गाह्रो हुन्छ बिना श्रम हातमुख जोर्न
कसो गरी समाउला खै जिन्दगीले लय ।

०००

मातातीर्थ, काठमाडौं

(काेराेना कालमा लेखिएकाे)