नेपाली हास्यव्यङ्ग्य अनलाइन पत्रिका

हिजो जो गर्दै थिए,
मोलतोलको राजनीतिमाथि प्रहार,
बेथितिप्रति कडा प्रतिकार ।
अब हेर्दै कुर्सीको मुहार ।
नाङ्लोको भन्टा झैँ
भएका छन् गुडुल्किने ।

पहिले थिए पल्कने
अब भएका छन् ढल्कने ।
मीठो वासना आयो जता
उतै हि हि गर्दै लुटपुटिने ।

कुर्सीदेवीको बाटो
फूलगुच्छा लिई कुर्ने
टाढैबाट देख्दा
फुरन्दाना झैँ फुर्ने ।

राल चुहाउँदै, गर्न थाले घ्यार-घ्यार,
बारम्बार भएका छन् लम्पसार
अनेक रूप रूपाय
कुर्सीदेवीलाई गर्दै नमस्कार ।

कहिले स्यालको हुइयाँ
कहिले बांदर झैं उफ्रदै टप्परटुइयाँ,
लोभको लेउमा चिप्लेर,
छपक्कै छोपियो उनको ज्ञान ।
सर्व मंगलकारी- इच्छाधारी
कुर्सीमाथि मात्र बकुले- ध्यान ।

०००
विराटनगर