नीलो रंग
म/सोचिरहेको छु यो नीलाम्मे माटोमा अब बग्ने रगतको रंग कस्तो हुनेछ ? किनकी यतिखेर यो देशको शासकले हेरिरहेको फिल्म पनि नीलो छ !
कोही त अवश्य छ ।
जसले पठाइरहेको छ नीला सलहहरू
हाम्रा संस्कृतिका हरिया फाँटहरूमा !
नीलो
निख्खर नीलो भेषमा उपस्थित छ
यतिखेर/समयको रंग !
ठ्याक्कै
आकाश जस्तै
समुन्द्र जस्तै
नीलो हुन्छ यातनाको रंग पनि !
निरन्तर घुमिरहेको पृथ्वीको समस्त गतहरूमा
जब/जब ठोकिन्छ चेतनासँग पदार्थ
जब/जब ठोकिन्छ मृत्युसँग अस्तित्व ।
तब/तब यसरी नै
नीलो हुन्छ परिस्थितिहरूको रंग !
जस्तो कि
अनन्त कालदेखि संक्रमणमा हिंडिआएको
हजुरआमाहरूको श्रापित योनी जस्तै
नीलो छ हाम्रो इतिहास ।
जस्तो कि
हाम्रा अचेत मस्तिष्कहरू टेकेर
निर्धक्क कुदिरहेको छ युगौंदेखि नीलो बतास ।
जस्तो कि
हाम्रा घर/गाउँहरू बगाउँदै राजधानी पसिरहेको छ-
नीलो पहिरो ।
जस्तो कि
हाम्रो आदिवासी देह कुल्चेर
यात्रारत छ आधुनिकताको नीलो सभ्यता ।
जस्तो कि
भ्यागुता झैं
बेहोसीको नीलो कुवामा हामी मौन छौं !
जस्तो कि
कोमाग्रस्त हामीहरू केवल हेरिरहेका छौं
आमाहरूको सेतो ब्लाउज
भाउजूहरूको सेतो फरिया
र छोरीहरूका रंगीन फ्रकहरूमाथि
घिस्रिरहेका नीला नीला कामुक आँखाहरू !
हामीहरू
यस धर्तीका मौलिक सन्तानहरू !
हामीहरू मूक हेरिरहेका छौं
तिघ्राका नीला/नीला निलडामहरू
नीला झिंगाहरू
नीला नीला दाँतहरू
नीला नीला प्रकोप र आतंकहरू !
सर्वत्र
नीलो रंग व्याप्त छ यतिखेर !
यतिखेर
अक्षरहरू नीला छन्
कविताहरू नीला छन् ।
यतिखेर
राष्ट्रको झण्डा नीलो छ
नीलो छ राष्ट्रिय गान !
प्रतिरोधमा हिँडिरहेको जुलुस नीलो छ
नारा नीलो छ ।
नीलो छ मसाल
आन्दोलन नीलो छ
नीलै छ आदर्शहरूको स्वरुप !
यतिखेर
हरेक साँझ/बिहान नीलो छ ।
– घाम नीलो छ ।
– जून नीलो छ ।
– सपना नीलो छ ।
– विपना नीलो छ ।
म/सोचिरहेको छु
यो नीलाम्मे माटोमा अब बग्ने रगतको रंग कस्तो हुनेछ ?
किनकी
यतिखेर यो देशको शासकले हेरिरहेको फिल्म पनि
नीलो छ !
०००
गोरखा