माैन आवाजघाम तापिरहेको बुद्धिजीवी
तासको खालबाट फर्केदेखि भट्टी पसलबाट फर्केदेखि वहाँलाई तारन्तार पखाला लागिरहेको छ ! अहिले वहाँ ट्वाईलेटमा हुनुहुन्छ र यो समयको सर्वाधिक चिन्ताको विषयमाथि चिन्तन गरिरहनु भएको छ !
मौन आवाज :
अहिले वहाँ
अत्यन्त सन्तापमा हुनुहुन्छ !
यो समयको सर्वाधिक चिन्ताको विषयमाथि
वहाँ चिन्तन गरिरहनु भएको छ ।
जस्तै
सागबारीमा घाँस उम्रदै गएको
छिमेकी महिला सपनामा आएको
शरीर शिथिल हुँदै गएको
मोबाइलको व्यालेन्स छिटो छिटो सकिएको
घरको रंग खुईलिंदै गएको
कपाल फुल्दै गएको ।
जस्तै
तातोपानीले नुहाउनुपर्ने
औंलाका नङहरू काट्नुपर्ने
दार्हीमा कालो लाउनुपर्ने
एकजोर नयाँ कोट सिलाउनुपर्ने
आँखीभुइँ मिलाउनुपर्ने ।
जस्तै
हरेकदिन बिहानै उठ्नुपर्ने
बजार जानुपर्ने
चिनी चियापत्ती किन्नुपर्ने
दुधवालासँग बाझ्नुपर्ने
प्रेसर नाप्नुपर्ने !
जस्तै
नातिलाई स्कुल पुर्याउनुपर्ने / ल्याउनुपर्ने
अखबारका हेडलाईनहरू हेर्नुपर्ने !
जस्तै
चिया पसलमा बसेर दर्शन जस्तो गफ
गफ जस्तो दर्शन खोक्नुपर्ने
गएका हजारौं वर्षहरूदेखि
आउने हजारौं वर्षहरूसम्मको
हिसाब किताब राख्नुपर्ने !
जस्तै
यो सरकार समाजवाद उन्मुख छ भन्नुपर्ने
एक बोत्तल रम वा भोड्का खल्तीमा हाल्नुपर्ने !
यो जाडोमा लुतो कन्याउँदै
घाम तापिरहेको बुद्धिजीवीको मस्तिष्कमा
अनेक चिन्तन चलिरहेको छ ।
अहिले वहाँ
अत्यन्त सन्तापमा हुनुहुन्छ !
जस्तै
तासको खालबाट फर्केदेखि
भट्टी पसलबाट फर्केदेखि
वहाँलाई तारन्तार पखाला लागिरहेको छ !
अहिले वहाँ
ट्वाईलेटमा हुनुहुन्छ
र यो समयको सर्वाधिक चिन्ताको विषयमाथि
चिन्तन गरिरहनु भएको छ !
अहिले उहाँ
घरको छतमा घाम तापिरहनु भएको छ ।
यसरी यो देश
घाम तापिरहेका बुद्धिजीवीहरूसँग
गुन्द्रुक सुकाउँदै छ !
०००
थानकाेट, काठमाडाैं
Subscribe
Login
0 Comments
Oldest
