नेपाली हास्यव्यङ्ग्य अनलाइन पत्रिका

अर्जुन दाहाल (क) :

अम्रिकामा भर्खरै स्थानीय चुनाव सम्पन्न भयो। चुनाव जसले जहाँ जिते वा हारे पनि सबैको दिमाग भने न्युयोर्कका ममदानी तिर नै केन्द्रित रह्यो। त्यसमा पनि अम्रिकामा बस्ने नेपालीहरूको चासो झन् धेरै । मुख्य कारणहरू मध्य तीन कारण तल क्रमशः प्रस्तुत छन् — ढुक्क भएर पढ्दै जानुहोस्।

सबैभन्दा पहिलो — उनी हाम्रो छिमेकी देश भारतका थप्पकै भान्जा,थर ममदानी। “म:म:” — हामी नेपालीहरूको मनपर्ने परिकारलाई ध्यानमा राखेर उनको नाम–थर नै जुरिएको जस्तो लाग्छ। त्यसैले होला, चुनाव जितेको साँझ उनले हतारहतार एक नेपाली रेस्टुरेन्टमा पुगेर म:म: खाएको फोटो सामाजिक सञ्जालमा भाइरल भयो। त्यो फोटो न्युयोर्कमा बस्ने उनका प्रमुख सहयोगी विष्णु राम्रा मगरले पहिलोपटक फेसबुकमा राखेका थिए।

दोस्रो — उनलाई न्युयोर्कमा बस्ने एक जना बाहेक सबै नेपालीले भोट हालेका थिए। “रविन पासा” बाहेक हरेक नेपालीले उनलाई मत दिएको भनिन्छ। केहीले त सिटिजन नभए पनि ‘ठ्याकठुक’ कुरा मिलाएर भोट हालिदिएको खबर सरगम बठ्ठाराईले मलाई म्यासेजमार्फत जानकारी दिएका थिए।

तेस्रो कुरा — ममदानी धेरै दानी हुनाले चुनाव जितेपछि न्युयोर्कका नेपालीहरूलाई बस/ट्रेनमा भाडा नलाग्ने, किनमेल गर्दा म:म: को कीमा, र्याप, बन्दाको मूल्यमा ५०% छुट, र नेपालीहरू बस्ने घरभाडामा पनि विशेष छुट दिने घोषणा गरेको बताइन्छ।

चुनाव हुनुभन्दा एक हप्ता अगाडिबाट नै नेपालीहरूले विभिन्न स्थानमा म:म: वितरण गर्दै ममदानीलाई मतदान गर्न आह्वान गरेका थिए। चिसो मौसममा म:म:को तातोपनसँगै ममदानीले न्युयोर्कको राजनीति समेत तताएका छन् ।

हिजो मात्र नेपालीहरुले ज्याक्सन हाइट्सको तल्लो तलामा उनलाई बधाई दिन विशेष म:म: पार्टीको आयोजना गरेका थिए । सो पार्टीमा बोल्दै ममदानीले नेपालका Gen Z हरूलाई एउटा विशेष सन्देश दिए,
त्यो हो “Turn your volume up.”

०००
व्यङ्ग्य लेखक: नुन चिनी पानी “अमेरिकाका परिकल्पनाकार ।”