नेपाली हास्यव्यङ्ग्य अनलाइन पत्रिका

नयाँ वर्ष आयो पुरानो हरायो ।
सबैमा खुसीको मुना फर्फरायो ॥
नयाँ चेतनाका नयाँ सिर्जना हुन् ।
नयाँ वर्ष स्रष्टाहरूका खुसी हुन् ॥१

थुनेका अँध्यारा खुलुन् ती दुवार ।
अहा ! भन्नसक्ने बनुन् यी मुहार ॥
उता कोइलीले भरुन् दिव्य वाणी ।
यता मक्खपर्दै बसुन् स्वस्थप्राणी ॥२

सधैँ बाल हाँसुन् र वृद्धा रमाउन् ।
भला वृद्ध देखूँ र सन्ताप भागुन् ॥
कतै खिन्नतामा नहोस् बास हाम्रो ।
सधैँ उर्वराले रमोस् भूमि हाम्रो ॥३

बसुन् प्रीत बाँडी सबै प्रेमिकाले ।
र सद्भाव जागोस् प्रिया तिर्सनाले ॥
गरौँ प्रेम चोखो र बन्धुत्व जागोस् ।
नयाँ वर्ष हाम्रो खुसीमा रमाओस् ॥४

बिनातेल बल्ने भए दीप हुन्थ्यो ।
बिनादोष मान्छे भए बुद्ध हुन्थ्यो ।
सधैँ मुक्त होस् रोष आक्रान्त हाम्रो ॥
नयाँ साललाई गरेँ प्रार्थना यो ॥५

०००
भक्तपुर