डुबोस् देश चाहे
यता भन्छु यो देशको रक्त मै हुँ उता भन्छु स्वामी ! सही भक्त मै हुँ हमेशा दुई धार जिब्रा अँगाल्छु डुबोस् देश चाहे, म पार्टी सँभाल्छु ।
अरूबाट मैले सिकेँ राजनीति
अरूको सिकेँ जाल बुन्ने कुरीति
परेमा अरूकै म झण्डा उचाल्छु
डुबोस् देश चाहे, म पार्टी सँभाल्छु ।१
म मन्त्री बनूँ अर्ब खर्बौं कमाऊँ
गरीबी थमाऊँ र मस्ती जमाऊँ
यसै निम्ति सम्पूणर् ऊर्जा निकाल्छु
डुबोस् देश चाहे, म पार्टी सँभाल्छु ।२
मिलेदेखि सत्ता दुई तीन साल
म बेच्थेँ सबै देशको वस्तु माल
नदी भूमि सीमा र नक्शा म फाल्छु
डुबोस् देश चाहे, म पार्टी सँभाल्छु ।३
दुवै हात जोडी उता जान्छु माग्छु
पुनः लाज छोडी यता जान्छु माग्छु
परी पाउ ‘स्वामी’ भनी छाँद हाल्छु
डुबोस् देश चाहे, म पार्टी सँभाल्छु ।४
मलाई त सत्ता भए मात्र पुग्छ
कि लत्ता कि भत्ता भए मात्र पुग्छ
बरू ताप्न आगो म यो देश बाल्छु
डुबोस् देश चाहे, म पार्टी सँभाल्छु ।५
यता भन्छु यो देशको रक्त मै हुँ
उता भन्छु स्वामी ! सही भक्त मै हुँ
हमेशा दुई धार जिब्रा अँगाल्छु
डुबोस् देश चाहे, म पार्टी सँभाल्छु ।६
०००
चितवन