नेपाली हास्यव्यङ्ग्य अनलाइन पत्रिका

कृष्णशरण उपाध्याय पाैडेल :

गधा हुन्छ हेर्दा त घोडा समान
दुवै नेत्र या नाक गोडा समान
उही रूप देखिन्छ उस्तै छ गाल
दगुर्दा भने भिन्न देखिन्छ चाल । १

गधा घाँस खान्थे र चर्थे मजाले
दुबो-भूसले पेट भर्थे मजाले
थिए शाकभोजी सुखी मस्त-मौजी
रमाएर आवाज गर्थे मजा ले ।२

गधाको हिजोआज अर्कै छ चाला
नखाने मुना पात डाला निगाला
विना काजु मेवा नखाने नचर्ने
भए मांसभोजी सुरापान गर्ने ।३

गधा पाल्दथे अस्ति कोलीहरूले
कुमालेहरूले र धोबीहरूले
तिनै पाल्दछौं आज हामीहरूले
सबै निर्बलीले र ज्यामीहरूले । ४

गधा बोक्दथे अस्ति भारी र पोका
दिँदै दिन्नथे काममा कत्ति धोका
थियो प्राणमा धर्म साथै इमान
तिनै आज बन्दै गए बेइमान । ५

गधाले बिगार्दैनथे कत्ति खेती
कसैको कुनै हानि गर्दैनथे ती
परन्तु व्यथा आज थप्ने तिनै छन्
कर्‍याप्ने तिनै छन् हडप्ने तिनै छन् ।६

०००

बन्दीपुर, तनहूँ