नेपाली हास्यव्यङ्ग्य अनलाइन पत्रिका

कृष्णशरण उपाध्याय पाैडेल :

काण्डै काण्ड अनेक हुन्छ जहिले, त्यो देशको नाम के ?
भ्रष्टात्मा दलबाट रुन्छ जहिले, त्यो देशको नाम के ?
अर्बौं अर्ब लुटाउने कर छली , चाटेर थोरै चिनी
भन्नू त्यो कुन देश हो भुवनमै , नेतृत्व छन् निर्घिनी ?१

हुन्छन् क्विन्टल स्वर्ण काण्ड कहिले, त्यो देशको नाम के ?
ओम्नी काण्ड भनी चिनिछ कहिले, त्यो देशको नाम के ?
लज्जाले पनि लाज मान्दछ जहाँ, निर्लज्ज छन् काण्ड ती
नाच्ने केवल नग्न नर्तन गरी, छन् चण्ड या मुण्ड ती २

चिम्ली नेत्र सुडान काण्ड गरियो, त्यो देशको नाम के ?
झन् लज्जास्पद लाउडा पनि थियो, त्यो देशको नाम के ?
मात्रै लोभ र लाभ पाप धनका, बज्छन् जहाँ रागिणी
भन्नू त्यो कुन देश हो अब जहाँ, नाच्छन् खुनी बैगुनी ?३

बेच्ने काण्ड भए अनेक जनता, त्यो देशको नाम के ?
उस्तै काण्ड घटे सगर्व धमिजा, त्यो देशको नाम के ?
भ्रष्टात्मा खलका अनेक दलका, बज्छन् जहाँ मादल
भन्नू त्यो कुन देश हो जल दिने, हुन्नन् जहाँ बादल ?४

काण्डै काण्ड गरेर हाँसिरहने, त्यो देशको नाम के ?
कार्खाना जति जे छ नासिरहने, त्यो देशको नाम के ?
जन्मन्छन् शिशु अन्त जान जहिले, त्यो देशको नाम के ?
सक्दैनन् गरिखान कत्ति कहिल्यै, त्यो देश को नाम के ?५

०००
चितवन