नेपाली हास्यव्यङ्ग्य अनलाइन पत्रिका

भलादमी भोला :

सभामुख महोदय
सांसदले बैठकमा बिस्ट्याउन सक्छन्
हाइपर सांसदलाई डाइपर लगाइयोस्
तथानाम बोल्नेहरूको मुखमा
बाँसको फुर्लुङ लगाइयोस्।

सभामुख महोदय
बोल्नेहरूले के के बोलीसके
कोही मुसोले सिंहको दरबार भत्कायो भन्छन्
जनताका भान्साका समस्या छन्
भरि सिलिन्डर कहिले आउँछ कोही भन्दैन
बजारमा मँहगी छ
भाउ घट्नुपर्छ कोही भन्दैन।

करेन्टमा रेट बढाएर
सरकारले के गर्न खोजेको हो
कसैलाई मतलब छैन
संसदमा सांसद किन तातेका हुन्
एसी चलाइयोस् महोदय
खाजा कम भयो कि
पानी नपुगेको हो कि
भत्ताले गाडीभाडा तिर्न पुगेन कि
व्रत बसेकाहरूलाई फलफूल
सोध्नुहोस् महोदय
संसदका मायालु जोडीलाई
डेटिङका लागि कोठा छुट्याइयोस्
प्रधानमन्त्री नआएर
बैठक अवरुद्ध भएको छ।

भिडियो कलमा भएपनि
प्रधानमन्त्री बोलाइयोस्
थिलथिलो भएको यो देशलाई
स्लाइन पानी दिएर
जुरुक्क उठाउन पनि
हाइपर सांसदहरूलाई
डाइपर किन्ने पैसा छुट्याइयोस्।

०००
ओखलढुङ्गा
(९८४३०५४१६१)