नेपाली हास्यव्यङ्ग्य अनलाइन पत्रिका

कृष्णशरण उपाध्याय पाैडेल :

खाने हो हलुवा पुवा रसबरी, चम्चा हुनू केवल
खाने हो मह लालमोहन दही, चम्चा हुनू केवल
चम्चा बन्न सके मिठ्याउन कतै, मिल्ने छ मौका पनि
छक्का मार्न सकिन्छ नत्र कि भने, मारिन्छ चौका पनि १

बाक्लो दाल र झोल खानु छ भने, चम्चा हुनू केवल
भेटेका हर थोक खानु छ भने, चम्चा हुनू केवल
चम्चा बन्न सके त भोक भयका, हट्छन् सबै आपद
चम्चा बन्न सके विशेष तहका, भेटिन्छ कुर्सी पद २

सब्जी आलु अचार खानु छ भने, चम्चा हुनू केवल
मीठा माल हजार खानु छ भने, चम्चा हुनू केवल
चम्चा बन्नु विशेष योग्य हुनु हो, जी जी गरे पुग्दछ
गाली खानु परोस् तथापि मुखले, ही ही गरे पुग्दछ ३

चिल्लो भात पुलाउ खानु छ भने, चम्चा हुनू केवल
केरा अम्बक स्याउ खानु छ भने, चम्चा हुनू केवल
चम्चाभित्र अपार बुद्धि बलको, संघर्षको शक्ति छ
चम्चामा हर उन्नति प्रगतिको, साँचो सही जुक्ति छ ४

धेरै उच्च छलाङ मार्नु छ भने, चम्चा हुनू केवल
चिट्ठा या पद हात पार्नु छ भने, चम्चा हुनू केवल
चम्चा बन्न सकिन्न उत्तम भने, यो जिन्दगी व्यर्थ हो
सत्ता स्वाद लिइन्न रम् रम भने, के बाँच्नुको अर्थ हो ?५

०००
बन्दीपुर, तनहूँ