नेपाली हास्यव्यङ्ग्य अनलाइन पत्रिका

कृष्णशरण उपाध्याय पौडेल :

छन् रे टिक्टकमा विकार अति नै, यो बन्द गर्नू अब
छन् रे फोहर या घुरान यसमै, यो बन्द गर्नू अब
गर्ने होइन रे सफा र सुथरा, यो रोगको हो घर
मैला कत्ति बढार्न हुन्न अब ता, यो बन्द चाँडो गर ।१

आँखा भित्र किरा पर्‍यो यदि भने, आँखै निकाल्नू अब
औँलामा खटिरा भयो यदि भने, औँलै उखेल्नू तब
गर्ने होइन औषधी अब कुनै, सूक्ष्माणु कीटाणुको
फाल्ने हो हर अङ्ग अङ्ग तनको, रोगाणु जीवाणुको ।२

छन् झुत्रा अनि जीर्णशीर्ण  दल छन्, ती बन्द गर्नू छिटो
छन् थोत्रा चिथडा विदीणर् खल छन्, ती शीघ्र पार्नू पिठो
गर्ने होइन शुद्ध कत्ति दलका, फोहोर दुर्गन्ध ती
गर्नू टिक्टक लाख लाख जनका, सञ्जाल नै बन्द ती ।३

शिक्षामा छ विकार बन्द गरियोस्, सम्पूर्ण शिक्षालय
मन्त्रीमा छ विकार बन्द गरियोस्, सम्पूर्ण मन्त्रालय
यातायात र स्वास्थ्यमा विकृति छन्, ती बन्द गर्नू अब
न्यायाधीश र न्यायमै कुकृति छन्, ती बन्द अर्नू अब ।४

गर्ने टिक्टक बन्द हो अब छिटो, मान्छे सड्यो रे यहाँ
स्वेच्छाचार तथा अराजकपना, धेरै बढ्यो रे यहाँ
गर्दै टिक्टक बन्द, आम जनता, चोख्याउने काम छ
वाणी संस्कृतिको सुधारपनको, घोकाउने काम छ ।५

०००
चितवन